Aiman Batang Ai

From the Blog

Tasik gaga di Batang Ai, Bakun, Murum dikearap ulih nyungkak dagang temuai

Taken from Borneo Post
http://www.theborneopost.com/2016/01/05/tasik-gaga-di-batang-ai-bakun-murum-dikearap-ulih-nyungkak-dagang-temuai/

// Dikarang Chris Bishop //

KUCHING: Tasik gaga, berindik ari pengawa ngaga tekat ai di Batang Ai, Bakun enggau Murum dikearap ulih matak mayuh agi temuai datai ke Sarawak.

Menteri Dagang Temuai Datuk Amar Abang Johari Tun Openg netap ketetiga tasik nya ngembuan mayuh pekara ti manah kelebih agi ba sentang eco-dagang temuai.

Bepelasarka gaya baru ba pengawa dagang temuai maya ke diatu, iya madah tebal agi orang deka ngelawa ngagai palan ti bekait enggau pemaik rampa menua sereta mengkang ngembuan kampung asal.

“Tu seiti pengelebih ungkup kitai ke alai pemujur industri dagang temuai nengeri tu bepanggai ba ketetiga tasik iya nya di Batang Ai, Bakun enggau Murum.

“Kitai keran matak mayuh agi orang dagang temuai menua luar datai melanja duit sida ba tasik tu.

“Kitai ngelakuka pemaik rampa menua enggau main asal ke bisi dikembuan,’ku iya.

Abang Johari mansutka jaku tu rambau ngemata pengawa nyerah kunchi Aiman Batang Ai Resort and Retreat ngagai Planet Borneo lodge Management Sdn Bhd.

Dulu agi ari tu ungkup pengelama 20 taun, palan nya diempu Hilton lalu dikelala nengah nama Batang Ai Longhouse Resort.

Ngenang kaul ke sama, iya madah pengerambai ketetiga tasik nya chukup berat ketegal dalam timpuh 10 taun ti deka datai, industri dagang temuai di serata dunya deka bepelasarka eco-dagang temuai.

“Orang di serata dunya tebal agi rindu ngelawa ngagai palan ti mengkang ngenan pemaik rampa menua kelebih agi peranak ari menua China.

“Sarawak diatu benung ngerintis jalai ti ngena ba industri dagang temuai,’ku iya ke mega Menteri Pengawa Berumah.

Dulu agi ari nya, Direktor Operasyen, Gracie Geikie ba jaku pengelalu keran deka ngangkatka Aiman Batang Ai Resort and Retreat ngambi tai mai pemaik ngagai komuniti ke diau ngelingi.

Ku iya tiga program besai deka diatur di palan nya ba taun 2016 baka ke pekit belumba Trialtlon, ‘photography Challege’ enggau ‘Mountain Bike Challenge’.

Bela Sekretari Mendam Opis Menteri Dagang Temuai Dato Ik Pahon,Manager Besai Hilton John Warmington, Chairman Aiman Planet Borneo lodge Management Sdn Bhd Samat Othman enggau penyading penemu Tan Sri Anbang Ahmad Urai.

Read more: http://www.theborneopost.com/2016/01/05/tasik-gaga-di-batang-ai-bakun-murum-dikearap-ulih-nyungkak-dagang-temuai/#ixzz45Uk0oVqC